لماذا قمت بعمل مدونه ؟

ثاني بوست ليا في المدونه هقول الأسباب الى خلتني اعمل مدونه 
انا لفيت كتير في مدونات ناس كتيره و كنت بقرا كل البوستات الى عندهم و كنت احيانا برد عندهم برضه و انا غير معرف و اتعلمت كتير كمان منكوا كلوا ان اول حاجه ان ده اسمه بوست مش موضوع عشان يبقي مختلف عن المنتدي بقي .


واول مدونه دخلتها تقريبا كانت مدونه انجليزيه لما كتبت بحث في جوجل و طلعتلي النتجيه بس مش فاكره كنت بدور عن ايه و عجبتني فكره ان يكون ليك مكان بتتكلم فيه في كل الى انت عايزه بدون ما حد يقولك انت بتقول ايه و مبتقولش ايه 


يعني انت الى بتحط قوانينك بنفسك ، فكره جميله بصراحه و مكنتش متوقعه ان فيه مدونين عرب كتير كده و لفيت بقي في كل المدونات و ناس كمان كنت بتابعهم دايما و بقرا بوستاتهم 


وكان فيه مره مدونه لواحده مطلقه ، اه و الله العظيم و كانت بتعمل تسجيلات بصوتها و انا كنت بحب اسمعها قوي بس للأسف ضاع اللينك من عندي و مش عارفه اوصله 


فانا قدامكوا كلكوا بقي هعمل حاجه جديده ، هعمل دستور لبيتي الثاني الى هي مدونتي يعني ، ودستوري بسيط اني هقول كل الى نفسي فيه بس مش هغلط في حد و هتكلم بعقل جامد و هبعد عن ان احكم قلبي هو مش في كله صحيح بس هحاول و كمان دستوري ان احاول اكتب حاجات تفيد اي حد يقراها و احاول اكون معاكوا في مشاريع الخير الى انتوا بتعملوها 


بس خلاص ده دستوري 


و ده بقي حاجه ساقعه لكل واحد هيشرفني هنا في المدونه ، بس كل واحد له ازازه واحده بس